Historia Curtia
de Cabranes

De toles grandes dómines históriques qu’estudiamos na escuela queden resclavos nel nuestru guapu conceyu de Cabranes. Dellos son evidentes y conocíos por tol mundu, y otros tán más escondíos, pero toos estos elementos prueben la esistencia de cabraneses dende tiempos inmemoriales, anque nun respondieran a esi xentiliciu nin s’identificaren coles señes d’identidá qu’anguaño consideramos tan nuestres. Como les pieces sueltes d’un puzzle inmensu, los historiadores supieron descifrar nos restos arqueolóxicos aquello que pa los profanos sigue siendo delles veces malo d’entender.

Un paséu cronolóxicu pela historia d’esti cachín d’Asturies va llevanos al alborecer de los tiempos, al Neolíticu, cuando los pueblos prehistóricos dexaron d’abeyar detrás de la caza y emprecipiaron a asentar nes zones altes del conceyu, pa cultivar la tierra y criar ganáu. Enterraron amorosamente a los sos difuntos nel Monte Aliñu (Fresnéu), nel Monte Incós (La Parte) y en Peña Cabrera (Ñao). Na Edá de Fierro llegaron pobladores nuevos, los astures luggones, que dexaron la so güelga en La Coroña de Castru (Iría). Tamién se fala de los ocurrentes cabrangini, que combatieron al invasor procedente de Roma colocando veles nos cuernos de cabres pa faceles pasar de nueche por guerreros y despistar asina al enemigu mientres ellos atacaben pela otra banda.

Asina ganaron los astures y los cántabros la fama de bárbaros guerreros que resistieron al imperiu, como aldea gala, siempre acordies cola visión de los civilizaos historiadores griegos y romanos, polo menos hasta l’añu 15 enantes de Cristo. De la romanización que vieno depués alcontramos delles muestres nel territoriu de Cabranes. El conocíu como Camín de los Moros, en Pandenes, ye en realidá un tramu de calzada romana, que se pue enllazar con una piedra miliar que dio nome al llugar conocíu como La Miyer, Torazu. Los topónimos Pandenes, Los Villares y Cenvís proceden tamién del nuestru pasáu romanu. Un castru en La Cobertoria (Castiellu, Torazu) ye tamién d’esta dómina.

A pesar de los sieglos de romanización y d’evanxelización cristiana, los astures nun perdieren les mañes de los guerreros celtes, y demostráronlo nel momentu inaugural del reinu d’Asturies. Nun podemos saber si hubo cabrangini ente los cristianos axuntaos alredor de don Pelayo, yá qu’amás na batalla de Cuadonga en 722 nun fueron cabres llevando veles na nueche, sinón los mesmos ánxeles celestiales los qu’intervinieron pa da-yos la victoria frente a los musulmanes. Créese que se trató más bien d’una acción de guerrilla ensin intervención divina dala, pero en tou casu l’invasor musulmán nun perdió más el tiempu n’Asturies y dio media vuelta.

Nos más de diez sieglos de la Edá Media, Cabranes medró en población, y dexó nel territoriu la so güelga relixosa en forma d’iglesies emblemátiques. La llábana fundacional de la ilesia parroquial de Graméu (semeya páx.15) indícanos que se construyó nada menos qu’en 846, dos años enantes que la de Santa María del Naranco, anque por causa de les reformes y reconstrucciones, la última del sieglu XIX, yá nun salte a la vista esti orixe tan remotu. Del so contemporaneu Monesteriu de San Clemente de Viñón sabemos que’l rei Ordoñu I fizo un otorgamientu nel 875 a favor de la ilesia d’Uviéu. D’un momentu daqué posterior ye la pequeña ermita de San Llorienzu de Camás.

Tovía anguaño la ilesia parroquial de San Xulián de Viñón sigue guardando’l secretu de la so cronoloxía. Consérvense nella elementos d’estilu románicu primitivu asturianu propios del sieglu IX, pero con toa seguridá esistió dende’l sieglu XI. Nun se sabe si se construyó na época de transición ente los dos estilos o si ye en realidá una construcción románica con señaldá del prerrománicu.

Pero non too yeren templos. Un sarcófagu antropomorfu en Santolaya, y la necrópolis de Santiago na redolada de La Puerte son tamién medievales, pero’l niciu esactu d’una inscripción non descifrada sobre una gran piedra, y una lleenda sobre una ayalga ellí enterrada ye un misteriu. De distintos sieglos de la llarga dómina medieval tán amás la Torre del Cuetu (Fresnu), y el despobláu de Guardo y la so malatería pa lleprosos (Naveda), arriendes d’un fornu de cerámica en La Güerta (Torazu), del sieglu XII o XIII.

Ye per esta dómina, en 1270, cuando’l rei Alfonso X el Sabiu condede’l Fueru de Benavente pal so gobiernu a Villaviciosa, a Nava y tamién a Cabranes, momentu nel que se convierte en conceyu. Enantes d’esta fecha, yera parte del territoriu conocíu como Maliayo, xunto con Villaviciosa.

Nes engarradielles ente reis castellanos (Enrique II y Pedro I El Cruel) el territoriu de Cabranes confiscáronlu los vencedores (los descendientes d’Enrique II), convirtiéndose en tierra de realengu y, según les cróniques, en territoriu llibre, anque pue suponese que los llabradores cabraneses nun notaron la diferencia.

Como’l tiempu nun apara, el Medievu dio pasu al Renacimientu. Nel sieglu XVI construyóse la ilesia de Santolaya sobre una ilesia románica primitiva. Del sieglu siguiente, el XVI, son Santa María la Real de Fresnéu, llevantada nel reináu de Felipe II. Seis cabraneses de daquella embarcaron na llaceriosa Armada Invencible del Rei Prudente escontra Inglaterra.

Llegaos de Les Amériques, la patata y sobre manera’l maíz emprecipiaron a cultivase en Cabranes. La patata sustituyó en gran parte a les castañes na alimentación diaria. Y el maíz, de rendimientu mayor que los pastos p’alimentar al ganáu, dexó llibres munchos tarrenos pa pumaraes nun momentu nel que la sidra empezó a esportase fuera del conceyu y d’Asturies, y a xenerar más beneficios.

D’estilu barrocu ye la inscripción de 1685 de San Martín de Torazu, con pintures bien conservaes na so perguapa bóveda de crucería. Otra inscripción na sobrepuerta de la Casona de Torazu muestra la fecha de 1677. Yá nos 1700 se construyó la ermita de Nuestra Señora de La Sienra.

En 1744, Camás tovía yera un conceyu independiente, con asientu del Císter incluyíu, pero amestóse a Cabranes en 1826. Del sieglu XVIII son les casones de La Podada y la de los Riego en Fresnéu. Muestren orguyosos blasones (escudos na fachada) una casa en Sendín (Santolaya) y el conocíu como Palaciu de Graméu. Construyéronse otros templos de tipoloxía popular como’l de San Antoniu de Camás y el de San Bartolomé de Pandenes.

Sicasí, toos estos templos y cases dícennos poco de la historia de les xentes de Cabranes que les contruyeron coles sos manes. Ye a partir de les revoluciones de los sieglos XVIII y XIX n’Europa cuando los llabradores, enantes simples siervos o feligreses, emprecipien a mover la historia. Asturies, nel so tradicional aislamientu ente la cordalera y el mar Cantábricu, llega tarde a los cambios, y tovía más en llugares rurales d’orografía tan peculiar, como la cabranesa. Cuando la minería y industria tresformaben la economía y la sociedá asturianes, l’actividá del conceyu siguía siendo la mesma qu’en tiempos ancestrales, ye dicir, ganadera, sidrera, maderera y artesanal. En Cabranes namás esistíen la mina San Xosé en Peñella y la d’antracita de Vegapallía, en Viñón, qu’emplegó hasta 200 trabayadores y trancó en 1964.

La economía rural de subsistencia yá nun daba p’alimentar tantes boques, y les families cabraneses mandaron a munchos de los fiyos a los conceyos mineros y industriales, mientres otros marcharon a “facer les Amériques”. Los sieglos XIX y XX caracterizáronse poles lluches obreres, les revoluciones reprimíes con dureza, les dictadures y la emigración masiva.

Na posguerra civil, a varies families de Cabranes mandáronles al campu de concentración de Figueiras. Yeren rehenes del réxime de Franco, qu’esixía a cambiu de la llibertá la entrega de los familiares fieles a la República que continuaben cola resistencia como fugaos nel monte.

Unes décades enantes, en 1906, ñaciera l’Eco de Cabranes, que dende aquella y hasta anguaño recueye lo qu’asocede nel nuestru pequeñu conceyu. Ente les sos cróniques atopamos en 1912 la fundación del Club Cabranense de L’Habana, formáu polos emigraos a Cuba. Aportaron económicamente a la construcción de la carretera de Viñón y la de Graméu, a la instalación de llinia telefónica en Santolaya y a la meyora de les escueles. Tamién contribuyeron al progresu del conceyu’l Club Hijos de Cabranes, fundáu en Buenos Aires en 1957. Hasta los años 70 nun dexaron d’emigrar cabraneses p’Arxentina, Santu Domingu o Méxicu. Otros tantos marcharon con destín a Francia y Alemania. La Plaza l’Emigrante en Santolaya fai homenaxe a quien, lloñe d’olvidar la so tierra de nacencia, promovieron avances en Cabranes y compartieron asina la so prosperidá colos sos paisanos.

Pero l’éxodu rural siguió siendo la tónica de tol sieglu XX n’España, y muncha xente mozo y families enteres marcharon a los centros urbanos d’Asturies y del restu’l país, a la cata de formes de vida alloñaes de la ganadería tradicional o del cultivu de la mazana de sidra. Nada pudo camudar la tendencia de la despoblación, y munches de les aules escolares yá nun acueyen a ñeños y ñeñes. Nel censu de Cabranes de los primeros años 2000 contabilizáronse 1344 habitantes, menos d’un terciu de la población rexistrao nel sieglu XVIII. Esti primer cuartu del sieglu XXI vio la llegada, nun gotéu modestu pero constante, de población nuevo, mozo y menos mozo, de toa procedencia, d’Asturies, d’otres partes d’España y, sobre manera, del estranxeru. Un fenómenu que los medios de comunicación dieron en llamar neorruralismu, y qu’en Cabranes conforma yá cuasi la metá de la población, abriendo un capítulu nuevu na historia del conceyu. El tiempu dirá si la perda d’habitantes y falta de relevu xeneracional son irreversibles o si, pela cueta, colos efectos del cambiu climáticu, la vuelta al rural se fadrá inevitable y fadrá reñacer Cabranes.