Sitios d’interés
y pa visitar en Cabranes

Cabranes ye un conceyu suavemente accidentáu de pocu más de 38 kilómetros cuadraos. Praos, valles tupíos y viesques autóctones conformen un paisaxe de muncha guapura natural y rural, ideal pa disfrutar de la tranquilidá. Les maravioses viesques y montes d’esti conceyu conviden a los amantes de la naturaleza a realizar delles de les rutes señalizaes o ensin más pasiar pelos munchos caminos y siendes que llabieguen el conceyu.

Disfrutar de la so naturaleza enllena de vida pue combinase con visites culturales a la Ilesia románica de San Xulián de Viñón o’l Muséu de la Escuela Rural, o con paseos sosegaos pelos curvos caminos de los pueblos, nos que se pueden apreciar gran cantidá de construcciones tradicionales asturianes, caseríes, quintanes, horros y paneres. Podrá tamién apreciase la güelga de la emigración, nos munchos exemplos de cases d’indianos que chisquen el paisaxe, y edificios escolares qu’ayudaron a construyir los emigrantes cabraneses.

El Muséu de la Escuela Rural

Carretera AS-255, km 7.5 Viñón
Tel. 985 898 213
museodelaescuelarural@cabranes.es
www.museodelaescuelarural.com

Horariu:
Veranu
ma, mi, xu y do de 11 a 14 hores
vi y sa de 11-14 h y de 17-19 hores
Iviernu
ma, mi, xu, vi, sa y do de 11 a 14 hores
Llunes, pesllao. Miércoles, de baldre.

Nesta vieya escuela, construyida en 1908, el visitante va vese somorguiáu nuna atmósfera que va tresportalu a otru tiempu. A traviés d’una gran colección de muebles y material escolar que data de 1911 hasta 1970, el muséu ofrez un percorríu cronolóxicu pela Historia de la Educación n’Asturies. Nél algámase una visión amplia sobre’l mou de vida de maestros y escolinos nel entornu rural. El Muséu pertenez a la Rede del Museos Etnográficos d’Asturies.

Ilesia Románica San Xulián de Viñón

San Xulián de Viñón, declarada Bien d’Interés Cultural, ye un templu románicu perguapu del s.XI, con elementos característicos del arte prerrománicu asturianu, que munchos historiadores atribuyen a una construcción anterior del s.IX. Fuera l’horariu de les mises, pue disfrutase depués d’una visita al Muséu de la Escuela Rural, siempre que se solicite con antelación.

Torazu y Cervera

Torazu, cola so particular arquitectura indiana, singular ilesia barroca y requexos con encantu, presume de figurar ente los pueblos más guapos d’España. Ye amás l’escenariu de delles de les fiestes más vistoses del conceyu (ver páxines 16-21). Y a namás 2 kilómetros, el pueblu de Cervera abelluga una guapa ermita, cases antigües y un conxuntu d’horros que les precede varios sieglos: ún del sieglu XVI y una panera marcada cola fecha de 1645.

Sienda Fluvial del Ríu Viacaba

Un prestosu paséu a la vera’l ríu (emprecipiando na contorna del Viveru d’Empreses de Santolaya) ye la escusa perfecta p’apurrir al to cuerpu y mente una actividá saludable. El ruxir del agua, la guapura del paisaxe y la posibilidá de ver dalgún corzu pel camín, son razones abondo pa que t’animes a disfrutar de la esperiencia.

45 minutos.
3 kilómetros.
Camín llinial.
Dificultá baxa.

Ruta de Peña Cabrera

Disfruta de la naturaleza percorriendo una de les cimes de Cabranes. Ponte en forma nesti fácil senderu que s’espurre per ente fondos bosques y pericuetos con guapes panorámiques que te va llevar dende Santolaya, la capital del Conceyu, a Viñón, u s’asitia’l Muséu de la Escuela Rural. Esiste la posibilidá de facer la ruta circular siguiendo pela Sienda del Ríu Viacaba 2 kilómetros más.

2 hores.
7 kilómetros.
Camín llinial.
Dificultá baxa.

Sienda de los Molinos de Villanueva

El ruxir de ríu Sales, el cantu de los páxaros, el tascar de les fueyes, van ser los tos compañeros per esta ruta que te va llevar, a traviés d’un viaxe pel tiempu, hasta les ruines de los vieyos molinos de Cabranes. Entama’l camín dende la contorna del Viveru d’Empreses, ensin olvidar unes botes afayadices pa pasar dalgún qu’otru folleru.

Ruégase a quien transite per estes siendes que les mantengan llimpias d’esperdicios pal disfrute de tol mundo, y avise al Ayuntamientu de posibles peligros o daños. Gracies.

30 minutos.
2 kilómetros.
Camín circular.
Dificultá baxa.

Ruta del Corveru

Garra aliendu pal ascensu del primer kilómetru con unos 150 metros de desnivel… Adiéntrate na fondura de la viesca del Corveru, activa tolos tos sentíos y dexa que les tos pisaes t’ayuden a descubrir la esencia natural de Cabranes. Esiste la posibilidá de caminar 2 kilómetros más a traviés de la Sienda de los Molinos de Villanueva.

1 hora.
4 kilómetros.
Camín circular.
Dificultá media.